Etirazlar bazar ertəsi səhər tezdən İrəvanın bəzi yerlərində başlayıb. Onun iştirakçıları hakimiyyətdən Sünikdə milli maraqların qorunmasını tələb edirlər.

Bazar ertəsi səhər İrəvanın müxtəlif yerlərində etiraz aksiyaları keçirilir. Bəzi küçələrdə nəqliyyatın hərəkəti demək olar ki, bağlanıb.

Aksiyaların təşəbbüskarları həm siyasi partiyalar, həm ictimai təşkilatlar, həm də şəxslərdir.

Sputnik Ermənistanın müxbirinin verdiyi məlumata görə, Vəkillər Palatasının keçmiş rəhbəri, "Zartonk" (Dirçəliş) partiyasının rəhbəri Ara Zöhrabyan və tərəfdarları İrəvanın Arşakunyats prospektində mitinq keçirirlər.

Qeyd edək ki, Zöhrabyan bir müddət əvvəl öz Facebook səhifəsində “azadlıq hərəkatının” başlanması barədə yazıb, məqsədi Ermənistanın maraqlarına zidd olan sərhədlərin demarkasiyası və delimitasiyasına mane olmaq, o cümlədən imzalanması nəzərdə tutulan sənədlərin dərcini tələb etməkdir. Zöhrabyanın sözlərinə görə, hərəkat iştirakçıları hakimiyyətdən Ermənistanın ərazi bütövlüyünün qorunmasını tələb etmək niyyətindədirlər.

“Bizim mübarizəmiz dövlətçiliyi qoruyub saxlamaq məqsədi daşıyır. Ölkənin təhlükəsizliyi bizim hər birimizin əlindədir - Sünikdən Tavuşa, Şirakdan Artsaxa qədər”, - Zöhrabyan yazıb.

“Zartonka”nın lideri onu da bildirib ki, o və tərəfdarları noyabrın 22-də saat 17:00-da Respublika meydanında mitinq keçirmək niyyətindədirlər.

Ermənistan paytaxtının Myasnikyan prospekti səhər saatlarında “Kamk” (“İradə”) hərəkatının lideri Vaaqn Çaxalyan və “Sasna Tsrer” qruplaşmasının üzvü Pavlik Manukyanın təşəbbüsü ilə bağlanıb. Onlar həmçinin Ermənistanın və erməni xalqının maraqlarının müdafiəsində ictimai fəallığı tələb edirlər. Etirazçılar əllərində “Mən biganə deyiləm”, “Mən müdafiəsiz deyiləm” məzmunlu plakatlar tutublar.

Jurnalist və ictimai xadim Nairi Oxikyan və tərəfdarları Qələbə körpüsündə aksiya keçirirlər. Etirazçıların əsas tələbi Sünikdən keçən “dəhliz”in açılmasının qarşısını almaqdır. Polis yolu açmağa və nümayişçiləri oradan çıxarmağa çalışır. Onlar həmçinin bazar ertəsi saat 17:00-da İrəvanda Respublika meydanında toplanacaqlarını açıqlayıblar.

“5165” ictimai hərəkatının rəhbəri Karin Tonoyan da aksiya keçirmək niyyətində olduğunu açıqlayıb. O, Facebook səhifəsində tərəfdarlarının tələblərini baş nazirin, daha sonra prezidentin, daha sonra isə parlament binasının qarşısında təqdim edəcəklərini açıqlayıb. Saat 17:00-da isə 5165 hərəkatının nümayəndələri Respublika meydanına toplaşacaqlar.

Etirazlara görə paytaxtın bəzi mərkəzi küçələrində nəqliyyatın hərəkəti çətinləşir.

Www.soydasaz.kepenekci.net